«Сандаарыйар маҥан хаар»

Бүгүн ахсынньы 20 күнүгэр, Алгыстаах Арчы Дьиэтигэр «Сандаарыйар маҥан хаар» ырыа алыптаах дьоро түһүлгэтэ үрдүк таһымнаахтык ыытылынна.
Бу кэрэ киэһэҕэ «Сандаара» ырыа ансаамбыла уонна кинилэр айар үлэҕэ салайааччылара, Саха Өрөспүүбүлүкэтин үтүөлээх артыыһа, «Туймаада» судаарыстыбаннай ырыа ансаамбылын солистката Лина Акимова Саргылаах Саҥа дьылынан итиитик-истиҥник эҕэрдэлээн туран, ымыы гынан көтүппүт бэйэлэрин ырыаларынан дьоһун эҕэрдэ кэнсиэри утары ууннулар.
Дьоро киэһээни Ю.Е. Платонов аатынан Эстрада судаарыстыбаннай тыйаатырын артыыһа, Саха Өрөспүүбүлүкэтин култууратын туйгуна Алексей Григорьев-Эрчим бэйэтин дууһалыын чугас ырыаларынан өссө киэргэттэ.

Бу сүдү тэрээһини ис сүрэхтэриттэн иилээн-саҕалаан  ыыттылар «Арчы Дьиэтэ» айылгы киинин уус-уран салайааччыта, Саха Өрөспүүбүлүкэтин култууратын туйгуна Любовь Константинова-Кыталы Куо уонна «Туймаада» судаарыстыбаннай ырыа ансаамбылын солиһа, Саха Өрөспүүбүлүкэтин култууратын туйгуна Николай Роббек. Бу кэрэ киэһэҕэ сылдьыбыт дьон  сүргэтэ көтөҕүллэн, махтал тылларын эттилэр.Кэнсиэр кэнниттэн ыалдьыттар ансаамбыллыын уонна ырыаһыттары кытта өйдөбүнньүк хаартыскаҕа түстүлэр.  Ырыа түһүлгэтэ ураты истиҥ иэйиилээхтик ааста.
«Сандаара» ырыа ансаамбылыгар баҕарабыт айар үлэҕитигэр өссө үрдүк ситиһиилэри, саҥа таһаарыылары! Эһиги кэрэ куоласкыт, истиҥ иэйиилээх ырыаҕыт дьон-сэргэ сүрэҕин үөртүн, олоххо эрэли сыдьаайдын!