«Сайыына» кинигэ сүрэхтэниитэ

🌿🌿🌿🌿🌿🌿🌿🌿🌿

Атырдьах ыйын 22 күнүгэр К.И.Максимова-Сайыына аатынан уһуйааммытыгар Любовь Егоровна Матвеева-Сүүмэх  “Сайыына” диэн  уус-уран айымньытын ааҕааччы киэҥ араҥатыгар билиһиннэрэр кинигэ сүрэхтэниитэ буолан ааста. Манна Сайыына аймахтара Валерия Георгиевна, Уйбаан Уххан, норуот суруйааччылара Наталья Михалева-Сайа,  Дмитрий Наумов, Саха сирин суруйааччыларын сойууһун чилиэннэрэ, суруналыыстар – Владислав Доллонов, Дана Сард, Надежда Егорова, Айталина Никифорова, Уйулҕан,  курсааннар, Амматтан биир дойдулаахтара кэлэн көхтөөхтүк кытыннылар. Саҥа кинигэ ураты тыыннааҕын  бэлиэтээтилэр, санаа атастастылар.

🌿🌿🌿🌿🌿🌿🌿🌿🌿

Автор, уһуйааччыта  К.И.Максимова-Сайыына   дьикти олоҕун сэгэтэн, дьүһүйэн көрбүтүн, кинигэ хайдах суруллубутун, таҥыллыбытын туһунан олус иэйиилээхтик кэпсээтэ. Клавдия Ильинична балта Валерия Георгиевна чугас дьонун туһунан уус-уран айымньыны ааҕа олорон хайдах курдук долгуйбутун истээччини кытары үллэстэн истиҥ тыллары эттэ. Кинигэҕэ киирбит дьикти түгэннэр кэрэһиттэрэ, туоһулара кэрэ киһилиин Сайыыналыын алтыспыт дьон истиҥ махталларын, тапталларын сүрэхтэригэр сылаастык, харыстабыллаахтык илдьэ сылдьалларын кинилэр кэпсээннэриттэн, долгутуулаах чараас сыһыаннарыттан көрдүбүт, биллибит. Махтанабыт Айыыларга олохпутугар сүҥкэн суолталаах ытыктыыр, таптыыр киһибит Клавдия Ильинична дьон, норуот туһугар олорбут эркээйилээх олоҕун сырдатар ураты тыыннаах, дьоһуннаах үлэ тахсарыгар кыах биэрбиттэригэр. Махтанабыт Матвеевтар дьиэ кэргэттэригэр Георгий Николаевичка уонна Любовь Егоровна-Сүүмэххэ, Уһуйаан истээччилэригэр уонна Клавдия Ильинична ис кэрэ тыллар эйгэтин иилээн-саҕалаан баар гына сылдьар Домна Прокопьевнабытыгар! Айымньылаах олох кустуктуу суһумнуу турдун!

🌿🌿🌿🌿🌿🌿🌿🌿🌿