Открытие Спартакиады в Центре духовной культуры «Дом Арчы»

Бэс ыйын 5 күнүгэр Дьокуускай куораттааҕы “Арчы Дьиэтэ” айылгы киинигэр Саха Өрөспүүбүлүкэтин үөрэнээччилэрин спартакиадатын уотун уматыы дьоро түһүлгэтэ буолла. Кыттыыны ыллылар араас улуустартан Спартакиада кыттыылаахтара, тренердэр, Саха Өрөспүүбүлүкэтин үөрэҕин уонна наукатын миниистирэ Ньургуна Соколова, Саха Өрөспүүбүлүкэтин физическай култуураҕа уонна спортка миниистирэ Леонид Спиридонов. Алгыһы оҥордо Саха Өрөспүүбүлүкэтин култуураҕа туйгуна Петр Кыычкин-Сайылык Бүөтүрэ. “Саха сирин кэнчээри ыччатын спартакиадатын” оонньууларын мэҥэ уотун алгысчыт инникигэ эрэллээх Хаҥалас улууһун 2 Малдьаҕар орто оскуолатын 10 кылааһын үөрэнээччитигэр, мас-рестлиҥҥэ Россия икки төгүллээх чемпионугар Вероника Федороваҕа туттарда. Бу үөрүүлээх күн оҕо аймах мындыр өйүн сытыылыыр, тобуллаҕас дьоҕурун тобулар, сатабылын сайыннарар, чөл-чэгиэн олоҕу чэлгитэр сыаллаах-соруктаах бырайыак кэскили түстээтин, киэҥ эйгэҕэ сайда-үүнэ турдун.