Калининград олохтоохторугар сахалыы ырыа дьиэрэйдэ

Тэлэһийэн сылдьаммын

Тэһийбэтэх күннэрбэр,

Дойдум дьонун буламмын

Дьоллономмун үөрэбин…

                                         Я. Тыасытов

Ырыа тылыгар этиллэринии Алтынньы 27 күнүгэр Калиниград уобалаһын Зеленоградск диэн Балтика муоратын үрдүгэр турар янтарь таас курдук кэрэ куорат килбэйэр туонатыгар Норуоттар култуураларын киинигэр «Арчы Дьиэтэ» духуобунай култуура киинин иһинэн үлэлиир «Чэгиэн» хомусчуттар ансаамбыллара салайааччы Ульяна Захарова, Калининградка олохтоох сахалары түмэ тардан, Бүтүн Аан дойдутааҕы норуоттар сомоҕоһууларын күнүн көрсө «Хомус алыба» сахалыы тыыннаах эҕэрдэ кэнсиэри көрдөрдө. «Чэгиэн» хомусчуттар ансаамбыллара мэлдьи сахалыы ылбаҕай ырыаларынан, хомус кутуллар дорҕоонунан, сахабыт өлбөт-сүппэт култууратын, фольклорун,  дьоңңо-сэргэҕэ тарҕата, уран тыынын уһата сылдьаллар. Дьоро киэһэ  биир ураты нүөмэринэн Фатина Иванова мелодиятыгар «Хомус гимнэ» балкыырдаах бааллардаах Балтика биэрэгэр аан бастакытын сүрэхтэнэн, ылланан ыраахха дьиэрэйдэ.

Түмүккэ, «Ахтар-саныыр, үйэлээҕи түстүүр оһуохайбытыгар, түөлбэ күөлү санатар түһүлгэни төрүттээн, наҕылыччы-наскыччы үңкүүлээн күөгэлдьиппиппит эчи даҕаны үчүгэйин…» диэн үөрэ-көтө, махтана-астына хааллылар биир дойдулаахтарбыт.

Ансаамбыл кыттыылаахтара бары араас идэлээх дьон Саха ырыатыгар, музыкатыгар дууһалыын ылларан ыччат дьоңңо үтүөнү-кэрэни тарҕатар үтүө майгыларыгар, баай дууһаларыгар сүгүрүйэ махтанабыт.

Сырыыгыт-айаңңыт ситиһиилээх буоллун, хомус кутуллар тыаһыныы алгыстаах айаңңыт арыллан истин, дьол-соргу тосхойдун!

«Арчы Дьиэтэ» духуобунай култуура киин уус-уран салайааччыта, СӨ култууратын туйгуна Любовь Константинова – Кыталы Куо